ساره((اجزاء))

[دلوعة قطر]

اضع جديدي بين يديكمـ


((الحلقة الاولى))

((سارة)) كانت نايمة بهدوء وبراءة بس الازعاج اللي ياها من تلفونها خرب عليها نومها..فتحت عين وغمضت عين وهي عاقدة حواجبها بضيق من هالازعاج..
سارة(بضيق):الووو
الضابط:السلام عليكم
سارة:وعليكم السلام
الضابط:الاخت سارة حمد!!
سارة بقلب مقبوض:أي امر الشيخ
الضابط:والله يااختي مااعرف شاقولج بس مستوي حادث حق اهلج وهم بطريق الدفنة وهم بالطواري حاليا..اتمنى حد من هلج يمر علينا ويتطمن عليهم..
سارة وعلامات الصدمة بويهاا من كل صوب:شنو ..اهلي..حادث!!
وتم الضابط يشرح لها ويتكلم بس سارة كانت بعالم ثاني..بعالم خاص بامها وابوها سندها بهالدنيااااا..وشلون كلمة((حادث))دخلت بحياتها وعكرت صفوها بهالوحشية..
وقطع حبل افكارها صوت الضابط وهو ينادي باسمها:اخت سارة..انتي معاي!!
سارة وهي من العالم الثاني:أي معاك
الضابط:لازم حد من هلج يمر علينا القسم والطواري..عشان الاجراءات والله يشفيهم ان شاء الله...
سارة بهدوء:ااامين
وسكر منها الضابط وهو كاسر خاطرة ردة فعل سارة..ودعا لاهلها ان يقومهم بالسلامة مع انه هالشي مستبعد كليا...

امااا بطلتنا سارة بعد ماسكر الضابط مااعرفت شتسوي ..على طول دقت لخالها((علي))..
وبعد ثلاث رنات رد علي..
علي:هلا سويرة
سارة والدموع بدت تنهمر بهدوء من عيونها بعد مااستوعبت الخبر:خالي الحقناااا
انقبض قلب الخال:شفيج سارة..شصاير!
خبرت سارة خالها باللي قاله الضابط بكل حرف وهي تشاهق بين جملة وجملة من الضيق والقهر اللي تحس فيه...
الخال:لاتخافين يبة انا اللحين بروح لهم وباشوف السالفة..ان شاء الله يكون حادث بسيط
سارة(برجاء):تكفى ياخالي ودني معاك بموت ان تميت على حالي
كسرت خاطر خالها ووافق ياخذها معاه المستشفى..
وبعد نص ساعة مر علي على بنت اخته سارة وخذها وراحوا المستشفى..وخذوا لهم نص ساعة لين تحاشوا الزحمة واوصلوا لغرف اهل سارة..

وهي غرف العناية الفائقة...

....................

سارة بنت وحيدة امها وابوها ... امها انسانة طيبة وحبوبة حيييل والكل يشهد لها بطيبتها واخلاقها العالية..بس بعد مااولدت سارة بسنتين صادها مرض بالرحم مما خلاها تسوي عملية استئصال..وبهالعملية مااقدرت تنجب بعد سارة..
وابو سارة((جابر))انسان خلوق بمعنى الكلمة وااايد يحب عا يلته اللي هي زوجته وبنته واخته(ندى) الارملة اللي ماعندها غير ولد واحد واسمه ((فهد))واكبر من سارة بثلاث سنين..
كانوا هذيلن هم عايلته وكانت اخته ندى قبل لاتتزوج عايشة معاه بالبيت وكان نعم الاخو معاها..لما تزوجت طلعت من البيت بس بعد سنتين من زواجها ترملت لكن اصرت تبقى ببيت زوجها..فاخوها خلاها على راحتها..

اما ام سارة ماعندها الا اخو واحد اللي هو علي ..وعلي هذا موظف بشركة سياحية ومتزوج بس ماعنده عيال..وانسان حنون ويموت ع اليهال لانه محروم منهم..ودوم يعتبر سارة بنته مو بنت اخته..

.............................

نرجع لمحور القصة اللي بدينا بهاااا..

اول مااوصلت سارة وخالها علي صوب غرف العناية واعرفت انه امها وابوها بالعناية وحالتهم خطيييرة قعدت ع الكرسي وتمت تصييييح بصمت..علي اول ماسمع بالخبر حاول يمسك دموعه عشان يوقف مع بنت اخته..بس لما شاف دموعها انهارت نفسيته وقعد احذا سارة ولمها لصدره وصاح معاها...

بعد نص ساعة على هالحالة المأساوية طلع الدكتور من غرفة ام سارة وعلى ويهه علامات الخيبة وتقرب من علي وخذه على جنب واصدمه بالخبر..

الدكتور بحزن:والله يااخ علي اصابتها كانت خطيرة ونزيف المخ كان قوي وماقدرنا نسيطر عليه..وانتقلت لرحمة الله..الله يصبركم ويعينكم((وربت على كتفه بمواساه وراح عنه))
ماقدر علي يتحمل..اخته الوحيدة توفت..وتم يتأمل سارة بألم وحست سارة من نظرات خالها ان الوضع مايطمن فقامت من مكانها وتقربت منه بهدوء...

سارة وهي تمسح دموعها:خالي..شقالك الدكتور عن امي !!
علي وهو يحضن بنت اخته بقوووو:امج رااحت ياسارة..راااحت..ااااخ يااختي ليتني اقدر اعطيج من عمري عمر..ااخ يااختي
سارة كانت بحضن خالها وهي تسمع خبر وفاة امها..استرجعت ذكرياااات هاجمتها بقوووو..تذكرت في مرضها كيف امها قامت فيها..تذكرت لما كانت تقوم مفزوعة من النوم..وتنادي يماااا وامها تجيها بلمح البصر وتضمها..وبدت تصيييح بيأس بحضن خالها...

ومرت يومين على هالسالفة التعيسة..,..والكل كان حزين على فراق هالانسانة الحنونة اللي طيبتها موزعة ع الكل..

اما ابو سارة كان للحين بالغيبوبة..وحالته خطيييرة..وكانت سارة كل يوم تروح له وتقرا عليه هي وخالها وعمتها..بس مامن مجيب..

وبعد يومين بالضبط صحى ابو سارة وكانت سارة بالحمام تتوضا للصلاة..وكانت عمتها وخالها قاعدين احذا ابوها وافرحوا لما شافوه يبطل عيونه بصعوبة..

ندى(عمة سارة):فديييتك يااخوي(وهي تمسح دموعها)
بو سارة(بصعوبة):ندى..وصيتي سارة ياندى..سارة
ندى بخوف:لا يااخوي انت اللي اوصيك فيها..سارة مابقا لها غيرك..تكفى يااخوي وسندت راسها على صدره..
والتفت بو سارة لعلي:علي..سارة تحبك وااايد ياعلي..حط بالك عليها..وصيتي سارة ياعلي..اااا((بس ماكمل انتبه علي لرفعة سبابته..وتمتمت شفايفه وعرف انه هاذي النهاية..وتوفى ابو سارة..ولحق زوجته وحبيته ..للعالم الثاني))

سارة اول مااطلعت من الحمام وهي تسبح بسم الله..شافت عمتها مسندة راسها..على صدر ابوها وتصيح..وخالها يصيح بهدوء..عرفت انه ابوها بعد خلاها مثل امها..وركضت لحضن ابوها وتمت تصيح وهي تناديه..

سارة (بحزن عميييق):يبة قوووم تكفى امي راحت لاتروح..من بقى لي..يبة تكفى
راح علي لبنت اخته وحضنها وخلاها تصيح على صدره..


وقامت التعازي والكل كان حزين على سارة وعلى مصيرها المجهول..
سارة البنت اللي ماتتجاوز 12سنة..خسرت امها وابوها باقل من اسبوع...الكل كان حزين ويحاتيها...واولهم خالها علي..كان محتار بحالها وخااايف عليها وااايد وعلى نفسيتها..سارة بايام العزا كانت كله تصيح وتقرا قران لاتاكل ولاتشرب ..,كان الحزن مخيم ع الكل..



:

:

القدر شاللي يخبيه لبطلتنا الصغيرة((سارة))
كيف بتعيش ومع من..وشاللي بيصير عليها بهالزمن القاسي!!

ترقبوا الحلقة الثانية من...............سارة

[خذاني الشوق]

يعطيج الف عافيه

علىى القصه

بأنتظار الحلقه الثانيه

[دلوعة قطر]

يسلمو على المرور

[Al-7zeeN]

يعطيج العافيه عالقصه الحلوه

بإنتظار الحلقه الثانيه




تقبلي تحيااتي

[دلوعة قطر]

((الحلقة الثانية))


ع الساعة 1بالليل وبعد ماراحوا الناس بيوتهم في ثالث ايام العزى..قرر علي يروح لسارة يتطمن عليهاااا..ركب الدري وهو قلبه معورة على بنت اخته الوحيدة اللي يحس انها بنته اللي مو من صلبه.. وفتح باب غرفتها ولقاها غارقة بالظلاااام..وسمع شهقات خفيفة من سرير سارة..وعرف انه مصدر الشهقات سارة...
توجه صوب السرير وقعد على طرفه وحط ايده على شعرها ومسح عليه بحنان..
علي:سارة حبيبتي
سارة بصوت مخنوق:هلا خالي
علي:قومي اكلي لج شي فديتج مب زين اللي تسوينه رب العالمين مايرضى..
سارة ببكاء مررر:مااقدر ياخالي..والله مااقدر..احاول بس مااقدر
علي وهو يساعدها تقوم:يالله يالدلوعة قومي خلنا ناكل شي تراني يوعان وانتي يوعانة..
سارة وهي تحاول تهدى:انت روح كل ياخالي انا مو مشتهية
علي بحنان وهو يضمها:انا ماراح اكل الا اذا كلتي معاي
سارة بيأس:اوكي ياخالي انت روح وانا بألحقك..
علي وهو يبوسها على خدها:اوكي اترياج
وطلع وصكر الباب وراه ..وهو حابس دمعة حارة ..
اما سارة بطلتنا راحت اسبحت وبدلت وطلعت لخالها..نزلت من الدري وهي تشوف البيت كيف مظلم من غير امها وابوهاااا..حتى زوايا البيت تسأل سارة عنهم..
احرقتها الدموع من يد ويديد..وحست بشهقة مخنوقة بصدرهاااا..واقعدت على الدري لان ريلها ماتقدر تشيلهااا..وغطت ويها بايدينها وبدت نوبة الصياح اليديدة..وسمعها خالها من المطبخ وراح لهااا,,
علي(بخوف):سارة شفيج ابوي!
سارة وهي ترتمي بحضن خالها بحزن:خالي ابيهم ليش ماخذوني معاهم
علي وهو يصيح معاها حسرة:اااه ياسارة..تكفين خلاص والله ماعدت اتحمل
سارة:جااان خذوني معاهم..ليش راحوا وخلوني
علي:استغفري ربج يابنتي مب زين هالكلام..ربج مايرضى
سارة احضنت خالها وصارت تبكي بمرارة...

وتموا عل هالحال حوالي عشر دقايق..وبعدها خذها علي ووداها المطبخ وبالغصب رضت تاكل ساندويش صغير وكلت حبوب للصداع وشربت ماي..ومن كثر الصياح حست انها تبي تنام...
سارة:خالي انت بتبات عندي اليوم..
علي وهو يبتسم:أي حبيبتي بابات عندج اليوم..ومن باجر بنجهز اغراضج عشان تنتقلين عندنا..
سارة بتردد:و ريم!!
علي بضيق:شفيها ريم؟
سارة:اخاف تتضايق من وجودي
علي وهو يحاول يطمنها:لا تخافين غلاي..ريم تحبج..وقلبها طيب
هزت سارة راسها مع انها واثقة ومتاكدة ان ريم مرت خالها ماتدانيها ولاتداني امها..ودعت بقلبها ان يهون عليها المصايب اللي تتحذف عليهااا..

حس علي باللي يدور بافكارها..ورفع راسها بيده :سارة انتي بنت اختي الوحيدة..وقريبة مني وااايد..مستحيل اتخلى عنج تأكدي من هالشي..

ابتسمت سارة وحست بالامتنان لخالها الغالي عليهااا وايد..


............

وانتقلت سارة باغراضها وحاجياتها لبيت خالها اللي مايبعد عن بيتها الا بمسافة بسيطة..واول ماوصلت رحبت فيها ريم..وعزتها وطمنتها ان بيت خالها مثل بيتها,,وتطمنت سارة شوي..بس حست انه الايام الجاية مابتمر بخير..لكن مابيدها شي..
ومرت الايام وبدوا الناس يخفون بالتعزية..وبدت سارة تداوم بالمدرسة..بس حالتها نفسية كانت تعبانة..وهالشي بين عليها واثر على مستواها الدراسي..وكانت عمتها كل يومين تزورها وتسأل عنها وتشوف طلباتها..واعرضت عليها كذا مرة انه تعيش معاها..بس سارة ماكانت تبي تزعل خالها لانها تدري انه بيزعل لو فضلت بيت عمتها على بيته..فكانت كل مرة تعتذر...

..........................

ومرت الايام مرة تشحن بداخلها الذكريات الاليمة..وكانت سارة تكره بيتها اللي هو بيت ابوها وتحس انه ماله معنى من غير اهلها فكانت كل ماتمر صوبه تحس بحرقة بقلبهاااا..صارت حياتها الم وحزن..ماقدرت تقاوم الحزن كل اللي قدرت عليه انها تتكيف معاه..وصار الحزن ملمح من ملامحهااا..

وكانت ريم مرت خالها رغم جفافها كانت تعامل سارة زين..احتراما لها لانها يتيمة..بس في داخلها كانت تتمنى البعد عنها بأسرع وقت..وبيوم قررت تفتح السالفة مع علي..
كان علي توه راد من دوامه..واول مادخل سأل عن سارة..مما اثار غيرة ريم المرضية..من يوم مايات سارة عندهم واهتمام علي بها ملاحظ..وريم غيووورة بشكل مرضي وتغار على ريلها من الهوى شلون عيل لو وحدة شاركتها بعلي حتى لو هالوحدة تعتبر بنت اخته..وغلاها من غلا بنته....
علي وهو يتقرب من ريم:هلا ريم شحالج! وييين سارة؟
ريم بضيق:روح دور عليهاااا
وقامت من مكانها متوجها لغرفتهاااا..بعصبية..
طنش علي لانه يعرف تفكير ريم عدل ويعرفها غيرتها المرضية..فما عطى السالفة اهمية وراح صوب غرفة سارة..وطق الباب
سارة:نعم
علي بأبتسامة:ها سارونة شحالج!
سارة وهي تتقرب من خالها وتبوسه على راسها:بخير انت شخبارك؟
علي:انا بخير اذا انتي بخير..شلون المدرسة والدراسة؟
سارة بابتسامة صغيرة:الحمد الله مااااشي
علي:الامتحانات مابقا عليها شي..وانتي شاطرة ماابي اوصيج
بهاللحظة جاتهم ريم والشرار يتطاير من عينها:لاتوصي حريييص هاذي حمص ماينخاف عليهااا..
علي تضايق من اسلوبها:قولي ماشاء الله ياريم
ريم بعصبية:شقالوا لك عني حسادة!!!!!!!!!!
سارة وهي تحاول تهدي الموقف:لا ياريم خالي مو قصده
التفت ريم لسارة بعصبية:انتي مالج خص لاتتدخلين بأشياء ماتخصج فااهمة
علي بضييق:ريم..روحي غرفتج واللحين باجيج
ريم:ان شاء الله انت تامر راضها على اقل من مهلك
وراااحت غرفتها والشياطين تناقز بويهاااا..جنها بتذبح لها حد..
ماتمالكت سارة اعصابها ودمعت عينها غصبا عنها من الموقف اللي صار..كسرت خاطر خالها ..وضمها وهو يهديها..لانه عارف شكثر سارة حساسة..وماتتحمل أي جرح..
علي:اوش لاتصيحين ماعليج منها..تلاقين شي مضايقها وحطت الحرة فيج
سارة:ادري انها ماتحبني
علي:لاتقولين هالكلام..ومااوصيج بدراستج
ابتسمت سارة بين دموعها..:ان شاء الله
وطلع عنها خالها..وسكر الباب وهي رمت نفسها ع السرير وبدت موجة الصياح..

صداقة انا ودموعي ..وصرنا اكثر من احباب
يغليني وانا اغليه ولايفرقنا الوداع
صدااقة انا ودموعي..يهديني بالمسا عذاب
وصباحي بقربه..مثل مركب بليا شراع

وبدت تسترجع ذكريات ريم مع امهااا..
بيوم من الايام كانت سارة قاعدة مع امها العصر يسولفون عن الحفلة المدرسية..اللي مسويينها المدرسة لامهات الطالبات المتفوقات..وكانوا يخططون بفرح وسرور..
واللي عكر صفو هاللحظة دخول ريم عليهم بطريقة مفاجأة وتهجمها على امها بالصراخ..
ريم:هييي انتي مب علشان سكت عنج طول هالمدة تمصخينها
فاطمة(ام سارة):شفيج ياريم هدي حالج وتفضلي ارتاحي واللي تبينه بيصير
ريم بوحشية:لاتقصين علي بهالكلمتين..هالكلمتين قصيهم على اخوج..لكن انا ماينقص علي..ابعدي عن حياتنا ولاتشيشين علي على مرته وبيته..خلج بحالج
فاطمة (بأستغراب):انا متى شيشيت علي عليج والا على بيته..انا مو من طبعي اتدخل بحياة حد ياريم..انتي اكيد فاهمة السالفة غلط...

لكن ريم تمت تصااارخ وتقط من الكلام الجااااارح وبقسوة جدام سارة..اللي احرقتها الدموع لحظة هجوم الذكرى البائسة..فاطمة ام سارة مو من عوايدها تتدخل بحياة اخوها مع انه اخوها الوحيد ومالها غيره..بس مو من طبعها اللقافة والحشرية..والسالفة انه ريم تبي علي يسوي عملية خطيرة لانه عقيم وهالعملية نسبة نجاحها عشرين ف المية..وريم مايهمها شي غير انها تجيب عيال..والدكاترة حذروا علي من هالعملية انها خطرة على صحته وماانصحوه يسويها لكن ريم تمت تحن وتحن على علي..فما قدرت فاطمة تسكت فقالت لعلي ان مايسوي العملية وبلاهم الاطفال اذا كانوا بياخذون صحته..وعلي اقتنع بوجهة نظر اخته ورفض يسوي العملية..ومن هاليوم بدت العداوة بين ريم وفاطمة وكانت سارة شاهدة على هالاحداث..

.......................................


سارة تمر بضروف صعبة..والواقع يصدمها كل يوم..
ريم..وناوية تظهر سارة من بيتها..شموقف علي من هالاحداث هل بيرضخ لريم ورغباتها الدونية..!


تريوووني في الحلقة الثالثة من..........سارة

[دلوعة قطر]

يسلمو على المرور

[راوي الأحلام]

والله القصه حلوه قريتها كلها
بانتظار البارت الياي
لاتطولين علينا
ويعطيج الف عافيه

[راوي الأحلام]

والله القصه حلوه قريتها كلها
بانتظار البارت الياي
لاتطولين علينا
ويعطيج الف عافيه

[دلوعة قطر]

يسلمو على المرور

[دلوعة قطر]

((الحلقة الثالثة))


ثاني يوم الصبح قامت سارة على صوت المنبه .. وحست بكسل ..بس تعوذت من ابليس واسبحت وتوضت وصلت صلاة الفير..وتمت تقرا قران لين استوت الساعة6ونص..اللي هو موعدها لروحة المدرسة..وفعلا بدلت ومشطت شعرها الطويييل وهي تمشطه سرحت فيه تذكرت امها لما كانت تمشط شعرها كل صبح وتعجفة لها..ونست نفسها وسط دوامة الذكرى ....

سارة بسعادة:يما تدرين لما انا امشط شعري..يعورني..لكن انتي ايدينج سحرية مااحس بشعري وانتي تمشطينه..
ام سارة:ههههههه سحرية عاااد..الفرق ياحبيبتي اني امشط شعرج شوي شوي..اما انتي تمشيطينه بقووو..وبسرعة..فيعورج
سارة:هههههه والله لما امشطه احس اني اتهاوش معاه..
ام سارة بحنان:فديت شعرج..لما كنت صغيرة كنت اتمنى تجيني بنت واربي شعرها ويستوي بهالطول..والحمد الله حقق لي مرادي

...........

صحت سارة من ذكرياتها بدق خفيف ع الباب..
سارة وهي تمسح دمعة حارة نزلت من اثر الذكرى:تفضل
علي:صباح الخير
سارة :صباح النور
علي(بأستغراب):كنتي تصيحين؟؟
سارة(وهي تحاول ترقع):اا لا بس كنت امشط شعري بقووو وعورني فدمعت عيني
علي..اهااا اوكي..استعيلي يالغالية عشان اوصلج المدرسة وماتتأخرين
سارة:ان شاء الله ياخالي

ابتسم لها خالها بحنان وطلع..وهي دقيقتين الا هي جاهزة شلت شنطتها..ولحقت عمها ولقت ريم في غرفة الطعام تتريق وعلي حذاها يقرا جريدة..صبحت على ريم وهي تتحاشى النظر لها..وريم ردت عليها بهدوء..فارتاحت سارة من ردهااا
شربت لها حليب..وكلت كرواسون..وبعدها شلت شنطتها ولحقت خالها..

ف السيارة..

سارة بحزن:خالي علي انت تزور امي وابوي ف المقبرة؟
علي وعلامات الحزن واضحة:أي حبيبتي ازورهم كل اسبوع
سارة:مايصير ازورهم معاك؟
علي مبتسم بأسى:لا حبيبتي مايصير المرأة تزور القبور..الرسول عليه افضل الصلاة والسلام نهى عن هالشي..
هزت راسها سارة بخيبة:انزين ممكن توصل سلامي لهم
علي:ان شاء الله يبلغ سلامج لهم..بس محتاجين لدعائج واااايد ياسارة..لاتبخلين عليهم بهالشي...
سارة:ان شاء الله..لاتوصيني

ووصلوا المدرسة..,اول ماانزلت سارة زاجهة رفيجة عمرها مها..مها هاذي من عمر سارة..ورفيجتها من اول ابتدائي..مافرقتهم السنين ولاغيرت عليهم..وكل وحدة تعتز بصداقة الثانية..وتعتبر الثانية اختها مو بس رفيجتهااا...

مها بأبتسامة:هلا والله صباااح الخير
سارة:صباح النور..شحالج مهوي؟
مها:والله عاااايشييين..امشي ندخل قبل لايدق الجرس

ودخلوا صفوفهم..وقضى اليوم الدراسي عند سارة مثل كل يوم..

وردت البيت كالعادة مع خالهااا علي..

ولقت ريم..قاعدة بالصالة..والشرار يتطاير من عينهااا..

دشت وسلمت هي وخالها..
بس ريم ماردت..تجاهلتها سارة وركبت الدري..وهي راكبة الدري سمعت ريم وهي تصارخ على خالها....

ريم:يعني ادق لك واقولك سيارتي تعطلت مر علي الدوام..تقولي ردي مع اختج لاني اخاف اتأخر على سارة!!!!!!!!!!!سارة وسارة وسارة..مب حالة هذي

علي بعصبية واضحة:ريم تراج وااايد مصختيها..البنت يتيمة..وحركاتج هذي ماتعجب حد
ريم:أي دافع عنها..لازم هذي اخت الغالية..شوف ياعلي..ان ماتعدلت واستويت مثل الاول..والله لااطين عيشتك واهد البيت عليك وعلى سارة..فاااهم
بس علي تجاهلها وصعد الدري وانتبه ان سارة توها دخلت غرفتها وسكرت الباب وراها..تضايق لانها بالراحة اسمعت الكلام اللي دار بينه وبين ريم..ماعرف شلون يرقع لسارة..فتعدى غرفتها ودخل غرفته..

اما سارة كانت صديقتها دموعها تواسيها وتخفف حمل الهم عليها..تمت تصيييح وجاها خالها ونادها للغدى بس هي رفضت بحجة انها ماكلة بالمدرسة ومو مشتهية..ومع كثرة الصياااح نامت وهي حاضنة صورة امها وابوهاااا..

...............

ومرت الايام على بطلتنا الصغيرة سارة..والدنيا كل يوم تصدمها اكثر واكثر..
وجاها اخر الاسبوع اللي هو موعد روحتها لبيت عمتها ..اتفقت هي وعمتها انها تروح لها كل ويكند وتقضي عندها..وبداية الاسبوع ترجع بيت خالها..

وكانت حزة الضهر من يوم الخميس ترتب اغراضها بشنطة صغيرة..عشان تروح لعمتها..وبعد مارتبت اغراضها نزلت ولقت خالها قاعد يترياها عشان يوصلهااا

علي:هاه حبوبتي جاهزة؟
سارة تبتسم وتهز راسها:أي
علي:يالله توكلنا على الله((وشل شنطتها وهي تبعته))

وراحت بيت عمتها..
ورحبت عمتها فيها..واول ماشافتها احضنتها بقووو..لانها تذكرت اخوها المرحوم..سارة خذت من ابوها ملامحه الهادية وطباعه مثل الطيبة وعزت النفس..وخذت من امها الحنان..والحساسية من اقل موقف..

وبعد ماسلمت على عمتها شافت وفهد ولد عمتها وكان يلعب سوني فراحت صوبه..
سارة:فهد شخبارك؟
ألتفت فهد عليها كأنه توه منتبه لها:اوه ساروه ييتي؟؟هلا والله
سارة وهي تبتسم:أي ييت وينك ماتسأل عني
فهد بروح مرحة:ههههه والله اخذ اخبارج من امي بين فترة وفترة
سارة وهي تقعد ع الكرسي:اخبار الدراسة معاك؟
فهد:والله ماااشي وانتي..اذا محتاجة لدروس خصوصية تراني بالخدمة هههه
سارة:هههههه اكييد استاذ فهد

وقعدت تسولف مع فهد وعمتها..وبعيدن طلعوا وراحوا وحدة من هالمجمعات..وتمشوا وكانت تحس سارة انها مع عمتها ترتاح اكثر..ع الاقل مافي كائن اسمه((ريم))يخرب حياتهاااا

وباخر ليلة بالويكند كانت سارة قاعدة تراوي فهد صورها وهي صغيرة ويضحكون مع بعض..
ومرة وحدة فاجأها فهد بسؤال..
فهد بجدية:سارة انتي مرتاحة بيت خالج علي؟
نزلت سارة راسها والعبت باصابعها:خالي مامقصر معاي..بس مرته ريم..احسها مب مرتاحة من وجودي..
فهد:اممم ليش ماتسكنين عندنا!!
سارة وهي تبتسم له:اخاف تملون مني
فهد بضيق:لاتقولين جذي انتي بنت خالي..ومستحيل نمل منج..وانتي ادرى شكثر امي تعزج..
سارة:بس خالي مايبيني اسكن عند حد غيره..
فهد:قولي له انج مب مرتاحة من مرته..
سارة بخوف:لا استحي..شبيقول عني عقب
فهد بيأس:كيفج..سوي اللي يريحج

.................

وخلص الويكند وردت سارة لبيت خالها..

شالاحداث اللي تتريا سارة!!

نبي توقعات للحلقة الياية.....من سارة

[دلوعة قطر]

((الحلقة الرابعة))

جهزت سارة شنطتها الصغيرة عشان ترجع بيت خالها..وبعد ماجهزت لها دق لها خالها انه يترياها عند الباب..وسلمت سارة على عمتها وفهد وولد عمتها..ووصلها فهد عند الباب وهم ماشييين..

فهد:ساروه أي شي محتاجته دقي لي لاتستحين..
ساره بمزح وهي تضربه على راسه:ماباقي الا انت استحي منك..هههههه
فهد:هههه مع ويهج مب يد حشاااا..المهم ديري بالج على عمرج
سارة:ان شاء الله وانت بعد دير بالك على عمرك وعلى عمتي
فهد:ان شاء الله..سلمي عليهم

وركبت سارة سيارة خالها وحست انها مشتاقة له..فلمته بقووو وباسته على خده..
علي:هههههههه بل عليج فعصيتيني هههه
سارة:وحشتني..فديت ريحتك جنها ريحة امي
علي بحزن:الف رحمة ونور تنزل عليهم
سارة:ااامين

واول مااوصلوا البيت..نزلت سارة وحست بضيق لوجود ريم ودعت ربها يمرر هالايام على خير..

ريم اول ماشافت سارة وعلي داشين البيت وهم يضحكون حست بضيق..وحست انها ماتطيق سارة ..

سارة اول مادشت سلمت

ريم:وعليج السلام..هلا سويرة شخبارج؟
سارة:بخير..شحالج انتي؟
ريم:فقدتج
ابتسمت سارة وماردت..وبعد دقيقتين..

سارة:انا استأذن بروح غرفتي
ريم بأستهزاء:اول ماتجينا تنحبسين بغرفتج..ليكون شياطن احنا وماتبين تيلسين معانا
سارة بأستغراب:لا شدخل..مو قصدي..بس انا تعبانة ومانمت عدل اليوم
علي:ريم خلي البنت على راحتها..
ريم بعصبيه:تدخل المحامي..لازم بأخليها على راحتها هذي الشيخة وووو....

وبدا الصراع بين علي وريم..والسبب سارة

سارة دخلت غرفتها..وحطت شنطتها..وبدت تصيح..فكرت تتصل بفهد وتقوله..بس استحت منه,, وتذكرت لما قالها ان بغيتي شي دقي لي لاتستحين وهي طقته على راسه ..
وابتسمت وهي تقول بخاطرها::يحليلك يافهد

ومرت الايام..ثقيلة على سارة..وكانت ريم تدور الزلة عشان تجرحها وتهينها..بس سارة بطبيعتها صبورة..وتحاول انها تمتص غضب ريم..لخاطر خالها..

بس بيوم كان لها تأثيره على سارة..
كانت ريم تجهز الغدا وترتبه..وكانت سارة توها جاية من المدرسة..فراحت فوق على طول تتحاشى ريم ولسانها الزفر..وهي نازلة سمعت صوت خالها يتهاوش مع ريم..

علي وهو يحاول يكتم عصبيته:ريمو لاتصارخين اخاف البنت تسمعج..
ريم:شوف ياعلي صبرت عليك وااايد ومافيني صبر اكثر
علي بضيق:تبيني اطرد بنت اختي وتعيش ف بيت غير بيتي مااقدر
ريم:عنبووو مشاركتني بكل شي حتى فيك..مب حالة..شهر وانا مستحملة واكاني داخلة ع الشهر الثاني..ومب ملزومة اصبر اكثر
علي وهو يحاول يهدي اعصابه:ياريم ياحبيبتي..سارة مالها غيرنا..وانتي قلبج حنون..اعتبريها مثل بنتج
ريم:شنهووو بنت فطيم السوسة بنتي لاوالله حاشاني
وهني علي ماقدر يتحمل وسطر ريم على ويهااا:فطيم هذي اختي ومتوفية ومااسمح لج ياريم..اطلبي لها الرحمة..

ريم قبل لايسطرها علي كانت بأيدها ملة قزاز..وطاحت من يدها اول ماسطرها..سارة من غير وعي راحت لهم اول ماسمعت صوت التكسير,,وشافت القزاز ع الارض..وتجاهلت خالها ومرته..وبدت تلم القزاز من الارض بأيدينها...

بس ريم ماحن قلبها ع البنت..وخذت قطعة قزاز كبيرة ومن غير وعي شمخت كتف سارة وهي مدنعة تلم القزاز...

سارةحست بألم فضيييع والدنيا دارت فيها واصرخت:اااااااااه
ريم..بوحشية:كله منج..انا انطق لاول مرة لخاطرج وخاطر امج..مالج مكان في بيتي فاااهمة..
اما علي راح لسارة الي كانت تتلوى من الالم..والكتف ينزف بقووو وغزارة..ماصبر علي شل سارة ووداها الطواري..وهي تصيح بيده

في المستشفى..

كشف الدكتور على سارة..وخيطوا كتفها لانه الشق وصل العروج..وخلوها اربع وعشرين ساعة تحت المراقبة..وعلي مافارقها دقيقة..حس بقهر على ريم وتصرفاتها..

سارة وهي ماسكة ايد خالها بغرفة المراقبة:خالي ليش ريم سوت جذي
علي بضيق:سامحيني ياسارة..وسامحيها..صدقيني مب قصدها
سارة:دوم تدور لها عذر ياخالي
علي:تكفين ياسارة لاتحطين بخاطرج
سارة وهي تصيح بقهر::اااه وينك يايبة..وينج يايمة..لو انكم موجودين جان ماصار اللي صاااار
علي:لاتقولين جذي حبيبتي..لاتضيقيني اكثر
سارة وهي تحن على خالها:اسفة يالغالي..انت فيك اللي مكفيك..بس ودي اسأل ليش ريم تكره امي بهالزود..امي عمرها مااذت حد..

علي سكت ماعرف شيجاوبها..والا يشرح لهاااا..

وبعد المراقبة رخصوا سارة وراحت معاه البيت..واول مادخلت مالقت ريم فارتاحت وراحت غرفتها على طول..

اما علي راح يدور على ريم بس مالقاها..ولقا ورقة منها على الطاولة ف غرفة النوم..انها رايحة بيت اهلها ومالها رجعة الا بطلعة سارة من البيت...

سفه لها وتغسل وطلب عشا له ولسارة..بس سارة رفضت تتعشا وعذرها تعبانة والا الصج كانت من الضيقة تبي تنام..

بس علي ماخلاها جبرها تنزل معاه وتتعشا وارضخت سارة بالاخير..وتعشت مع خالهااا..وراحت تنام..

وثاني يوم غابت بسبة الجرح اللي بكتفهااا..

قامت ع الساعة 10 الصبح مالقت حد بالبيت..خااافت حست بوحشة..فدقت على خالها..والثاني طمنها انه هو بالدوام وريم بايته عند اهلها لانه امها مريضة..
مامشى عذر غياب ريم على سارة..وحست انه ريم راحت بيت اهلها والسبب اللي صار..بس طنشت وفكرت تدق على عمتها دون ماتجيب لها طاري باللي صار عشان ماتحاتيها..

العمة:الووو
سارة بفرح:هلا عميمة..ولهت علييج
العمة وهي تضحك::اااخ منج يالعيارة..توج من كم يوم عندنا ههههه
سارة:ودي اقعد اكثر عندج بس تعرفين المدرسة
العمة:فديتج ياريحة الغالي
سارة:::اااه ياعمتي ولهت عليهم
العمة وهي خانقتها العبرة:حتى انا يابنتي ولهت عليهم بالحيييل..الله يرحمهم ويغفر لهم..
سارة:عمتي شخبار فهد؟
العمة:بخير يمة..فهد بالمدرسة..الا ماقلتي لي ليش مارحتي المدرسة اليوم
سارة :ااا..تعيزت..وبعدين من زمان ماريحت فقلت اريح
العمة وهي تحس بخوف:سارة فيج شي تشتكين من شي؟؟
سارة وهي تمثل الفرح:هههه لاعمتي مافيني شي لاتخافين
العمة:الحمد الله..ياليتج يابنتي تعيشين عندي تحت انظري
سارة وهي تغير السالفة:انزين عمتي انا بسكر اللحين وبادق لج عقب سلمي على فهد
العمة:ان شاء الله..حطي بالج على عمرج ودراستج..وسلمي على خالج ومرته

..........

بعد ماسكرت من عمتها راحت غرفتها..,حست بشوووق فضيييييع لامها وابوها..وافتحت الكبت وضهرت منه البوم كبير...للصور

وبدت تلف على الصور صورة..صورة..اول صورة شافتها صورتها وهي صغيرة عمرها حوالي السنة..وابوها يلاعبهااا..بحنااان..ادمعت عينها وضمت الصورة لصدرها وهي تهمس بحزن:اااه وينك يايبة..وينك ياسندي..الف رحمة ونور تنزل عليك
وامسحت دموعها ولفت ع الصورة الثانية..ولقت نفسها بحضن امها وهي عمرها حوالي خمس شهور...وامها ترضعها بالمرضاعة..وابوها يلعوزها بريشة حمامة...

ابتسمت وهي تتذكر لما سألت امها قبل الحادث بفترة عن هالصورة...
:

:

:

سارة:يماااااا
الام:امري ياعيون امج
سارة وهي تراوي الصورة لامها::يماا كم كان عمري بهالصورة
الام ابتسمت وقالت:اممم حوالي خمس شهور
سارة:اهااا شنو هاي اللي بايد ابوي
الام:هههههههه هاي ريشة حمامة..خبرج ابوج يموت ع الحمام..وكان يدلدغ يبهتج بالريشة وانتي تصيحين..فكنت احوشه عنج
سارة:هههه فديت ابوي..ومنو اللي مصوركم
الام:هذا خالج علي
:
:

:

ادمعت عيون سارة..وهي تتذكر هاليوم..وبدت تفرفر بالصور..وهي تصيح..من الشوووق..

:

:

في غيابكـ ماتغير أي شي..بس حسيت اني فاقد كل شي







تريوني بالجزء الخامس من................سارة

[دلوعة قطر]

((الجزء الخامس))


لقت صورة من بين الصور فيها خالها وهو صغير وبجنبه امها وكانت ماسكة ايدين علي اللي مايتجاوز الثلاث سنين وقتها وهي كان عمرها7سنين..والابتسامة منورة ويووهم الطفولية..
تذكرت يوم العزاء لما خالها كان حاضنها ويصيح بحرقة..كان حزنه على اخته كبير..كبير..
سكرت الالبوم بعد مااسمعت حركة بالبيت..وراحت تشوف من اللي جاه..نزلت بخطوات هادية للطابق الارضي..ولقت خالها جاي وجايب معاه غدا..ابتسمت وانزلت تساعده..

علي(بمرح):ههههه يبتلج غدى ..لانه لاانا ولاانتي نعرف للطباخ
سارة (بضحك):ومنو قالك اني مااعرف!!
علي(بأستعباط):ههه صج شتعرفين ياحلوة؟؟
سارة:اعرف اسوي ساندويشاات جبن..رهييييييييييبة
انفجر علي من الضحك..وابتسمت سارة له وهي سرحانة بضحكته...وانتبه علي انها اسرحت وبسمتها كانت هادية ودليل على سرحانها..
علي بحنان يكلمها:شفيج سارونة؟
انتبهت سارة..وهزت راسها انه مافي شي..وانجبت الغدا وتغدت مع خالها..وبعدها خالها راح رقد..وهي غسلت الصحون..واصعدت غرفتها ..عشان ترتاح..

...........

اما ريم كانت بغرفتها رافضة تتغدا..وتحس انها ندمانة لانها هدت بيتها لسارة وطلعت..واستغربت ان علي مر عليه يوم كامل وماجا يعتذر لها..ولاحتى اتصل فيها يتطمن عليهااا........

ريم بخاطرها::اااه يالقهر..اللحين سارو هالنتفة تفرق مابيني وبين علي..بس انا اللي سمحت لهالشي يصير..الذنب ذنبي انااا..وتمت تفكر وتفكر وتفكر..والشيطان يساعدها ع التفكير..

..................

ومر حوالي سبوعين ع الاحداث اللي صارت..وكانت سارة مداومة بهالاسبوعين كل ويكند..تروح تقضيه بيت عمتها..وكانت عمتها تفرح بشوووفتهااا وايد لدرجة انها تخليها تنام معاها بغرفتها..وكان فهد كل يوم يوديها الدكان ويأججر لها افلام كرتونية اللي تحبها..ويسهر معاها ويسمعها ويخليها تقوله كل اللي بخاطره..

بدت سارة تتأقلم على غاب امها وابوها بس مو معنى هذا انها نستهم..كانت تدعي لهم دوم وتتصدق في ثوابهم..كل مازاد عندهاا من مصروفهاا..

اما ريم كانت على حالها ف بيت ابوها وتحس الدنيا مسودة بعينها وكل ماله قلبها يشيل ويشيل ويشيل على سارة..لاني مااسودت احشاء هالقلب..وبدت افكار شيطانية انتقامية تدور في بالهاااا..بس كانت تنطر الوقت المناسب...

وفي نفس الليلة لما لقت عمرها ضايعة من غير علي وراجعت قرار انها هي الداخلة وسارة الطالعة مو العكس رتبت اغراضها بشنطتها ودقت لعلي اللي استغرب اتصالهااا بعد هالفترة الطويلة من الغياب..وحس بشوق لما شاف اسمها على شاشة تلفونه..

علي:الووو
ريم وهي تتدلع:احبك
ابتسم علي ومارد عليها
ريم وهي اونة زعلانة:حتى لو ماتحبني انا احبك
علي:ومنو قال اني مااحبج؟
ريم بعتاب:احس انك ماتحبني والدليل انك مافكرت تسأل عني حتى
علي:اللي سويتيه مب شوي
ريم بخبث:خلاص سامحني والله طلعت عن طوري..ماتعرف شقد اشتقت لك ولسارة
علي وهو يحس بالراحة وعهو غافل عن هالخبث بثنايا حروف ريم:حتى انتي وحشتينا والبيت مايسوى بدونج..تبين امرج اللحين؟؟
ريم وهي بقمة السعادة:أي فديتك تراني بارزة وكنت داقة لك عشان تمر علي..
علي بحسن نية:تاااامرين امر غناتي
وسكر منها واتصل بسارة على طوول..
سارة:الووو
علي بسعادة:فديت الالووو انااا
سارة وهي تضحك:هههه فديت روحك..شحالك؟
علي:انا بخير ومستااانس حدي
سارة:دوووم هالوناسة ونسني معاك
علي:ريم دقت لي واحس انها ندمانة على كل شي صار..وتبيني امر عليهااا اللحين عشان ترد البيت معاي..
انقبض قلب سارة وحست بخوف من هالخبر..وتذكرت الحادثة الاخيرة اللي صارت مبينهم...
ولاحظ خالها سكوتها..وتوقع ردة فعلها..
علي:لاتخافين ياسارة..انا معاج..ومستحيل يتكرر اللي صار صدقيني..وريم مهما سوت قلبها طيب..بس عصبية..
سارة بهدوء:لاتحسب ياخالي اني مب فرحانة بردتها البيت بالعكس..انا ادري انك مب مرتاح وهي بعيدة عنك..والبيت بدونها مايسوى..بس ان شاء الله مايتكرر اللي صار..
علي بفرح وفخر بعقلانية بنت اخته:ان شاء الله

وسكررر علي من بنت اخته وراح لبيت اهل ريم وخذها ووداها البيت..وتفاجأو اثنينهم من اللي شافوه................


تتوقعون شنو شافوا؟؟




^



^






^

شافوا سار مرتبة ومعدلة البيت ومبخرته ومعطرته وحاطة الشموع بكل زاوية..وطالبت لهم عشاء فاخر..ومرتبته بطريقة ناعمة